Një pjesë prej jush mund ta kenë harruar Amido Balden, sulmuesin shtatlartë që janarin e shkuar u bashkua me Kukësin. Me të drejtë, pasi sulmuesi luajti shumë pak me fanellën e verilindorëve dhe la shumë pak gjurmë, me vetëm një asist e një gol. Pa u mbyllur kampionati Balde mori valixhet, për të kërkuar një destinacion të ri.
Duket se është mjaft i pafat 27 vjeçari, pasi edhe aventura në Libi ka përfunduar shumë shpejt dhe tani do të provojë një tjetër eksperiencë në Indonezi, ku do të mbrojë ngjyrat e skuadrës së Persebaya Surabaya. Sulmuesi ka hasur shumë vështirësi gjatë karrierës, teksa dëmtimet dhe problemet nuk e kanë lënë që të shkëlqejë, ndonëse në fillimet e tij ka luajtur edhe me skuadrën e Spotingut të Lisbonës.
Në edicionin e 2014-2015 te Kukësi zbarkoi dhe një mesfushor me origjinë nga Kosova, Ndriqim Halili. Vetëm 63 minuta në kampionat atë edicion për mesfushorin, duke mos mundur që të tregojë vlerat e tij. Tani, 26-vjeçari do të transferohet në Luksemburg, tek ekipi i FC Differdange 03. Një skuadër modeste, por që ka marrë pjesë në Kupat e Europë, pasi ka fituar tre herë Kupën.