“Nuk vazhdohet kështu”, Bicaj i qan hallin lojtarëve të Vllaznisë: 4 muaj pa rroga te Bylisi, po paguajmë për stërvitje

0

Në Shkodër futbollistët shpërthyen me bojkot për pagat e prapambetura, por ky duket se nuk është vetëm problem i tyre. Të njëjtin shqetësim e ka edhe lojtari i Bylisit Ditmar Bicaj, i cili i “qan hallin” lojtarëve të klubit të vendlindjes së tij, duke treguar se e njëjta situatë me rrogat është edhe në Mallakastër. Në një intervistë për “Syri TV”, mbrojtësi Shkodran shprehet se nuk dëshiron ta çojë situatën deri në dyert e gjyqeve, por i bashkohet kauzës te Vllaznia dhe ka kërkuar edhe ndihmën e Sindikatës për të gjetur një zgjidhje.

Bicaj thotë se moskorrektësia me rrogat nuk ëshët diçka e re në Shqipëri, teksa siaps tij presidentët vendosin të paguajnë lojtarët e tyre 6-7 muaj. Por paradoksi që sjell në vëmendje futbollisti i Bylisit është se jo vetëm që nuk po paguhen nga klubet, por janë duke nxjerrë para nga xhepi i tyre për të punësuar trajnerë personal që të stërviten gjatë kësaj periudhe.

Kriza financiare – “Ne ndryshe nga Vllaznia, kemi qëndruar në shtëpi. Arsyeja është se kemi katër muaj pa u paguar. Duke parë që nuk kemi gjetur zgjidhje ekonomike, kemi menduar të stërvitemi individualisht në Tiranë. Te Vllaznia ka bojkot të stërvitjes, por probleme ka në të gjithë futbollin shqiptar. Nuk mund të bëjmë sikur nuk ka ndodhur gjë, por duhet gjetur zgjidhja nëpërmjet një kontrate kolektive”.

Katër muaj pa u paguar – “Probleme ka patur ndër vite me pagesat. Futbollistët paguhen 6-7 muaj në një vit. Kjo është çmenduri e vërtetë. Përjashto ndonjë lojtar që i ecën, të tjerët kanë probleme. Nëpërmjet Sindikatës kemi kërkuar që t’i jepet një zgjidhje situatës te Bylisi, sepse nuk mund të vazhdohet më kështu. Kontrata duhet të respektohet përpara se të shkohet në gjyq”.

Stërvitja individuale – “Tani po paguajmë për stërvitjen. Nuk po paguhemi, por po paguajmë trajnerë nga xhepi ynë për stërvitje individuale. Do të jetë një periudhë mjaft e vështirë për futbollistët, pasi po të ketë ndeshje çdo tre ditë. Aq më tepër problemi shtohet nga ana psikologjike, sepse kur nuk paguhesh, kjo rëndon më tepër. Duhet të mblidhemi të gjithë së bashku për të bërë diçka. Me këtë rast përgëzoj Vllazninë, që ka marrë hapin konkret të bojkotit”.

E ardhmja – “Personalisht jam në kontratë me Bylisiin deri më 30 qershor 2020. Nuk dua të shkoj nëpër gjyqe dhe do konsultohem me avokatin tim. Pagat besoj se do merren, por nuk doja që kjo gjë të shkonte kështu. Në Shqipëri na kanë mbetur tashmë edhe mospagesat, që do t’i marrim parasysh. Në gjuhën popullore i thonë na ka zënë, por duhet ta rregullojmë”.

Sindikata – “Momentalisht jam në Shkodër me kryetarin e Sindikatës, Andi Lila, dhe lojtarët e Vllaznisë dhe do të diskutojmë për të ardhmen. Futbollistët janë të vendosur të mos dalin në stërvitje. I bashkohem kauzës së tyre, pavarësisht se nuk jam pjesë e Vllaznisë, por si ata jam edhe unë. Të respektohen kontratat deri në fund, pa shkuar nëpër gjyqe“, ka deklaruar Ditmar Bicaj./Halit Delibashi-Sport Ekspres/

 

 

You might also like

Leave A Reply

Your email address will not be published.