Mbledhje e organizuar nga FSHF, në fokus hartimi i një strategjie afatgjatë të futbollit shqiptar

Në ambjentet e FSHF-së është mbajtur ditën e sotme një takim, me qëllim hartimin e një strategjie afatgjatë për futbollin shqiptar. Pjesëmarrës në të ishin drejtuesit e disa prej departamenteve kryesore në Federatë, anëtarë të Komitetit Ekzekutiv të FSHF-së, si dhe përfaqësues të klubeve.

Ishte fillimisht Sekretari i Përgjithshëm i Federatës Shqiptare të Futbolli, Ilir Shulku, ai i cili mori fjalën, duke shpjeguar më tepër rreth këtij dokumenti, i cili është duke u krijuar në bashkëpunim me organizimin më të lartë të futbollit europian, UEFA-n./Halit Delibashi-Sport Ekspres/

Njoftimi i FSHF-së:

Federata Shqiptare e Futbollit organizoi sot një takim për të diskutuar në lidhje me hartimin e strategjisë së futbollit shqiptar 2020-2025. Në këtë mbledhje morën pjesë një grup pune i përbërë nga drejtuesit e disa prej departamenteve kryesore në FSHF, anëtarë të Komitetit Ekzekutiv të FSHF-së, përfaqësues të klubeve, ndërkohë që përmes video-konferencës mbledhjen e ndoqën edhe përfaqësues të UEFA-s.

Në fjalën e mbajtur në nisje të këtij takimi Sekretari i Përgjithshëm i FSHF-së, Ilir Shulku, shpjegoi rëndësinë e madhe, që ka ky dokument strategjik, që po hartohet edhe në bashkëpunim të ngushtë me UEFA-n, për zhvillimin e futbollit në të ardhmen dhe për vendosjen e disa objektivave të qarta.

“Kemi organizuar këtë tryezë për të diskutuar lidhur me nevojat e hartimit të një strategjie afatgjatë. Të gjithë e dimë tashmë se Federata Shqiptare e Futbollit është zhvilluar shumë në disa dimensione, kështu që ka lindur nevoja padiskutim që aktivitetet në FSHF patjetër të kenë nevojë për një dimension tjetër.

Në bashkëpunim me përfaqësues të UEFA-s dhe në bashkëpunim me klubet është hartuar një strategji afatgjatë. Dua të falënderoj përfaqësuesit e UEFA-s, të cilët kanë qenë ndër kontributorët kryesorë për hartimin e kësaj strategjie”, – tha Shulku, duke theksuar edhe një herë prioritetet që FSHF-ja ka në 5-vjeçarin e ardhshëm.

“Ka ardhur koha, kur ne duhet patjetër që prioritetet kryesore të Federatës t’i zhvillojmë dhe të gjithë aktorët bashkë të jemi në unison për ta ngritur edhe më lart nivelin e zhvillimit të futbollit. Nuk do të lija pa përmendur prioritetet kryesore, që kemi shpallur Asamblenë e Përgjithshme të FSHF-së, siç janë futbolli i femrave, futbolli i bazës, pra ai i fëmijëve, si edhe infrastruktura”, – u shpreh ndër të tjera Sekretari i Përgjithshëm i FSHF-së.

Pasi u prezantuan pikat kryesore ku do të mbështetet hartimi i këtij dokumenti, të pranishmit në mbledhje diskutuan për idetë të reja, që mund të përfshihen në strategjinë e futbollit shqiptar dhe u dakordësua një plan për vijimësinë e takimeve konsultative.

 

Leave a Reply

Your email address will not be published. Required fields are marked *