Luftëtari në hall, pa tre titullarë ndaj Vllaznisë

Gjirokastritët kthehet këtë fundjavë në fushën e tyre pas tri transfertave radhazi. Objektivi mbetet vetëm fitorja, që e afron ekipin me Europën

Gëzim Beqiri

Luftëtari ka tetë javë rresht që nuk po humb dhe me pesë fitore dhe tre barazime, duke përjashtuar ndeshjen e Lushnjës, këto rezultatet janë arritur ndaj kryesuesve të Skënderbeut, Kukësit, Partizanit. Barazimi në Laç është një rezultat i mirë, edhe pse gjirokastritët i kishin të gjitha mundësitë për të marrë 3 pikët. Futbollistët dje janë lënë pushim për të filluar sot nga përgatitjet për ndeshjen e ardhshme. Luftëtari do të presë në fushën e vet Vllazninë, që me siguri do të vijë për të marrë pikë. Kështu ka ndodhur edhe në dy ndeshjet e dy fazave të para, të kampionatit, ku skuadra shkodrane ka një fitore dhe një barazim me Luftëtarin.

MUNGESAT – Ajo që i duhet të zgjidhë në këtë takim trajnerit Hasan Lika është zëvendësimi i tre futbollistëve, të cilët ishin titullarë në Laç dhe që do të mungojnë për arsye kartonësh. Jakovljeviç dhe Rroca kanë plotësuar numrin e kartonëve të verdhë, kurse Aleksi do të mungoja për kartonin e kuq të marrë në Laç. Rikthehet në formacion Lejdi Liçaj, por do të jenë në dispozicion edhe Janku, Aurelio, Minga, si dhe Rapo, Lamçe dhe Dema, që u aktivizuan pjesërisht në Laç.

OBJEKTIVI – Pavarësisht se Luftëtari la në Laç dy pikë, në vazhdim ka mundësinë të ngjitet edhe më shumë në renditje. Gjirokastritët kanë zhvilluar tri ndeshje në transfertë, në Lushnjë, Durrës dhe Laç, ndërsa në vazhdim do të luajë më shumë ndeshje në fushën e vet. Edhe në transfertë Luftëtari ka qenë i suksesshëm në këtë sezon, duke grumbulluar  15 pikë nga 27 që ka gjithsej. Që në javën e ardhshme, nëse në disa takime si Kukësi-Laçi, Skënderbeu-Partizani dhe Lushnja-Kamza dalin fitues ekipet vendase, Luftëtari ngjitet në klasifikim dhe i bashkohet grupit që pretendon pjesëmarrjen në kupat europiane. Por kjo arrihet nëse do të fitojë ndaj Vllaznisë, që do të bëjë edhe ajo përpjekjet e duhura për të mos dalë e humbur në Gjirokastër. Luftëtari pretendon Europën, kurse Vllaznia do të kërkojë t’i shpëtojë rënies nga Superliga. Janë dy objektiva të ndryshëm, që do ta bëjnë edhe këtë takim tepër të rëndësishëm.

TIFOZËT – Laçi barazoi pas dy gabimeve elementare të mbrojtjes së Luftëtarit dhe kaq ka mjaftuar për të sjellë një reagim për disa prej mbrojtësve, përfshirë edhe portierin Ruçi. Ndoshta të mërzitur për faktin që Luftëtarit i “iku fitorja nga duart”, tifozët kanë reaguar ashtu, por ekipi jo vetëm që duhet mbështetur, por edhe përgëzuar, sepse për momentin ka rezultatet më të mira në Superligë.

Leave a Reply

Your email address will not be published. Required fields are marked *