Korçarët, peticion UEFA-s: Mos na dënoni mbi spekulime!

Një tubim në qytet në mbështetje të klubit nuk është hapi i vetëm i ndërmarrë nga tifozët dhe gjithë qyteti i Korçës, që tashmë do të dërgojë edhe një peticion në UEFA, me firmat e qytetarëve nga Korça.

Në peticion do të kërkohet të mos dënohet Skënderbeu, sepse do të ishte një dënim për një qytet të tërë dhe gjithçka do të ishte e bazuar në spekulime.

PETICIONI

Përmes këtij peticioni duam t’i kërkojmë UEFA-s jo vetëm që të mos dënojë ekipin e Skenderbeut, pasi ne jemi të bindur tek cilësitë dhe vlerat e padiskutueshme të skuadrës dhe përkushtimit sportiv e moral të ekipit dhe drejtuesve, por edhe të marrin fund spekulimet ndaj këtij ekipi që është shndërruar në krenarinë evropiane të një vendi të tërë! Ky është një peticion që drejtësia të mos veprojë, si zakonisht, si një tren që vjen kurdoherë me vonesë, por të marrë sinjale reale sidomos nga ne tifozët, që futbollin e shohim si një art që respektohet në adhurim!

Futbolli për Korçën është me shumë se një lojë, është besim. Kur mbaron ndeshja e futbollit, kur përfundojnë nëntëdhjetë minutat e kohës së rregullt, ajo çka mbetet është pasioni dhe gëzimi, bindja që lojtarët në fushë kanë dhënë gjithçka për të respektuar fanellën që veshin! Qyteti i Korçës jeton me futbollin. Jemi Skënderbeu dhe kjo skuadër nuk është thjesht një emblemë, është një histori e tërë lavdie dhe krenarie.

Në 8 vitet e fundit Skënderbeu ka qenë gëzimi i një qyteti. Në Korçë të gjithë kanë besuar dhe besojnë tek loja e ndershme e kësaj skuadre, e cila ka fituar 6 (gjashtë) Kampionate Kombëtare dhe ka marrë pjesë 2 (dy) herë në grupet e Europa League. Kemi nevojë për mbështetje dhe jo për një dënim, pasi ky do te ishte një dënim jo vetëm i të gjithë futbollit shqiptar, por i çdo tifozi dhe të apasionuari pas futbollit, që vlerëson ndershmërinë e futbollistëve që japin shpirtin në fushën e blertë. Nëse ndiqet rruga e dënimit të pamerituar e të mbështetur mbi spekulime, ka për t’u ndëshkuar një qytet i tërë, një histori krenarie e futbollit shqiptar në vitet e fundit.

Drejtësia dhe e duhura është e tillë edhe kur ngrihen zëra kundër që kërkojnë të hedhin dyshime të pabaza. Prandaj, me respekt ju kërkojmë të mos na e hiqni këtë histori suksesi. Skënderbeu u krijua në vitin 1909 por vetëm në vitin 2015 mundi që të afrohet në familjen europiane, duke bërë që ne si qytetarë të mund ta prekim këtë ëndërr. Arritjet e Shqipërisë në futboll janë shumë të varfra, aq sa kujtohen vetëm 2 momente kryesore: Kualifikimi historik i Kombëtares Shqiptare të futbollit në kompeticionin madhor Euro 2016 dhe përfaqësimi i dyfishtë i Skënderbeut në Europa League. Në kohën kur UEFA kërkon të zgjerojë futbollin në çdo shtet, dënimi i Skënderbeut do të sillte një goditje të rëndë për futbollin në Shqipëri, duke e detyruar padrejtësisht që gjithçka të rinisë nga e para.

Futbolli shqiptar falë mbështetjes së UEFA-s po i afrohet standardeve më të mira evropiane, Skënderbeu në gjithë këtë histori nuk është lakuar por është skuadra që ka zbatuar pikë për pikë çdo rregull, duke krijuar një frymë pune vizionare që shikon tek ndershmëria sportive kushtin për të triumfuar në sport.

Skënderbeu për Korçën është gjithçka, ndaj dhe ne sot kërkojmë drejtësi, vlerësim të djersës së derdhur ndershmërisht në fushë nga lojtarët në vite dhe jo dënim!

Skënderbeu nuk u përket vetëm korçarëve, por është skuadra e gjithë shqiptarëve. Në asnjë rast në gjithë historinë e skuadrës nuk ka pasur, nuk ka dhe nuk do të ketë asnjë lidhje me lojën e pandershme. Na ndihmoni të ecim përpara në këtë rrugë europiane! Na jepni të drejtën dhe drejtësinë!

Leave a Reply

Your email address will not be published. Required fields are marked *