Pas reagimit të klubit Partizani, distancimit të grupimit “Guerrils” nga parulla anti-gereke e shfaqur në stadium gjatë ndeshjes me Skënderbeun dhe qëndrimit të Presidentit të Republikës, Ilir Meta, për ngjarjen ka reaguar edhe Federata Shqiptare e Futbollit. Nëpërmjet një deklarate për shtyp, institucioni që drejton futbollin në vend, e ka cilësuar të papranueshme dhe raciste parullën e shfaqur.
Përveçse e dënoi ngjarjen, duke i nxjerrë “karton të kuq”, me bindjen se “grupimi i veçuar i tifozëve dhe çarçafi i shkurtër dhe i keq orientuar nuk mund të arrijë ta prishë imazhin e futbollit dhe tifozëve të vërtetë”, FSHF njoftoi se përgjegjësia i mbetet klubit organizator, në rastin konkret Partizanit dhe se Komisionet Juridike do të mblidhen në mënyrë urgjente, për të shqyrtuar incidentin dhe për të marrë masat përkatëse.
Deklarata e plotë e FSHF-së:
Federata Shqiptare e Futbollit shpreh shqetësimin e thellë dhe distancohet në mënyrë të prerë nga incidenti i djeshëm ndodhur gjatë ndeshjes Partizani – Skënderbeu, duke iu referuar qartazi parrullës së shpalosur në fillim të ndeshjes në seksionin e tifozerisë së Partizanit, parrullë dukshëm me sfond racist dhe me mesazhe të papranueshme për fushën e blertë dhe lojën e futbollit. Edhe pse u desh ndërhyrja e delegatit të ndeshjes për heqjen e atij çarçafi të errët, sërish qëllimi dhe akti mbetet shumë i dënueshëm.
Ajo parrullë që nuk ka asnjë të përbashkët me thelbin e futbollit për të bashkuar njerëzit në paqe e harmoni, nuk mund të jetë kurrësesi një element tifozerie e aq më pak të qëndrojë mbi flamurin tonë kombëtar. FSHF, duke dënuar me forcë gjuhën e përdorur dhe mëndjen e trazuar për t’a përzjerë futbollin me racizëm apo pseudo nacionalizëm, siguron opinionin publik dhe tifozët e vërtetë se stadiumet tona nuk do të shndërrohen asnjëherë në mediume konflikti dhe urrejtjeje por do të jenë në çdo rast e çast arenë ku mbizotëron fryma e solidaritetit, gjallërisë dhe dashurisë për futbollin. Ritheksojmë se distancohemi qartazi nga çdo provokim dhe shprehim bindjen se ky grupim i veçuar, çarçaf i shkurtër dhe i keq orientuar nuk do të arrijë të prishë imazhin e futbollit dhe tifozerisë së vërtetë.
Duke i nxjerrë kartonin e kuq këtij rasti të rrezikshëm për imazhin e futbollit, i sigurojmë të gjithë se do të merren të gjitha masat përkatëse që raste të tilla skenaresh dritëshkurtra jo vetëm të mos kalojnë pa u ndëshkuar por kurrësesi të mos përsëriten e të mos njollosin imazhin e lojës së futbollit. Duke theksuar se mbetet në përgjegjësinë e klubit parandalimi i këtyre incidenteve, në rastin aktual i klubit Partizani, bëjmë me dije se komisionet juridike pranë FSHF-së do të mblidhen në mënyrë urgjente dhe do të shqyrtojnë të gjithë incidentin për të vijuar me masat përkatëse.