Ish-sulmuesi i Skënderbeut po mban CSKA-n: Nuk e di pse ndodh para dimrit, 27 gola bëra në Shqipëri

Ali Sowe ka qenë një tjetër futbollist me potencial të madh dhe që ka luajtur në futbollin shqiptar me Skënderbeun. Sulmuesi 25-vjeçar ka arritur të shënojë 7 gola deri tani në Bullgari me CSKA-n e Sofjes, duke mbajtur mbi shpinë skuadrën, por njëkohësisht duke luftuar edhe për të shënuar më tepër gola se të gjithë të tjerët në kampionatin e Bullgarisë.

Në intervistën e fundit të dhënë për mediat vendase, Sowe shpjegon edhe transformimin që merr në gjysmën e dytë të sezonit, ndërsa deri në mbërritjen e janarit është më i qetë për kundërshtarët në fushë.

“Kur luaja në Itali me huazim, shpesh kisha 5-6 gola gjatë gjithë vitit. Në dy vitet e fundit dhe në fillim të dimrit, kam gjithmonë 6 gola. Nuk e di se pse ndodh kjo gjë, por kështu ka funksionuar. Në pjesën e parë të sezonit unë jam më modest. Pastaj forca zgjohet tek mua dhe nis të bëhem i rrezikshëm dhe produktiv. Në Shqipëri shënova 27 gola në një sezon, në vitin e kaluar shënova 17 gola. Tani si qëllim kam të shënoj më tepër se 17 gola”, ka thënë Sowe. /Sport Ekspres/