Intervistat/ Trajneri i Tiranës pas barazimi: Nuk e di sa fitore rresht morrëm, Superiorja nuk mbyllet këtu

Tirana është ndalur për herë të parë dhe nuk ka arritur të fitojë, që nga koha kur te bardheblutë ka arritur Egbo. Korçarët arritën të shënonin në pjesën e parë me Dejvi Bregun, që ka gjasa të jetë i fundit për Skënderbeun, pasi mund të transferohet në Rusi, atje ku merkato mbyllet në 21 shkurt. Ndërkohë golin e barazimit për bardheblutë e ka shënuar Kale. Më poshtë mund të ndiqni intervistat e protagonistëve për “Supersport”:

Ilir Daja (Skënderbeu): “Një pikë e fituar dhe dy pikë të lëna, pasi kishim mundësi të artë në fundin e lojës. Kemi spostuar Ditën në mesfushë, megjithëse është roli i vetë, por ka luajtur në qendër të mbrojtjes. Nëse Gripshi do të ishte treguar më fanatik atje në fund, do të kishim marrë tre pikët. Por Tirana është e fortë dhe ne jemi të kënaqur edhe me kaq. Elezi e ka fituar vendin e titullarit me punë, është kthyer në lojtar kyç për ne dhe i përket datëlindjes 2001. Gripshi është pak i justifikuar pasi ka ndërruar disa pozicione në fushë dhe do kohën e vetë. Mentaliteti i fituesit vazhdon të mbetet te unë, pavarësisht se kam qenë trajneri i Tiranës dikur”.

Dejvi Bregu (Skënderbeu): “Kënaqësi të luash dhe shënosh në këtë stadium fantastik. Më vjen keq që goli nuk kishte vlerën e tre pikëve, por edhe ky ishte rezultat i drejtë. Ku do të largohem tani në shkurt? Unë nuk e di për vete, të ma thonin do të bënin mirë (qesh). Tani jam duke pritur. Kam ndierë dhimbje që nga nxehmja dhe i thashë trajnerit që do të duroja”.

Egbo (Tirana): “Nuk e kemi nisur mirë ndeshjen në pjesën e parë. Këtë u kam thënë edhe lojtarëve, ndërsa ai episod te goli i Skënderbeut që ne kemi gabuar, ndryshoi rrjedhën. I ndodh të gjithave skuadrave, por jam i kënaqur me atë grintë në pjesën e dytë. Ka edhe shumë ndeshje, nuk ka mbaruar kampionati këtu. Bylisi nuk toleron dhe Kukësi do e ketë të vështirë, por nuk më interesojnë skuadrat e tjera. Jam munduar që t’i ul lojtarët me këmbë në tokë, pasi njerëz janë dhe ka eufori. Unë për vete as që i kam llogaritur fitoret rresht që ne kemi marrë deri tani”.

Leave a Reply

Your email address will not be published. Required fields are marked *