Inter i dobët mendërisht, një detaj tregon sa inferior është në Europë

0

Luçiano Spaleti e quajti Interin “skuadër nervoze dhe jo në lartësinë e duhur”, pas eliminimit nga Champions League, me barazimin dëshpërues ndaj PSV-së në San Siro. Ishte një provë pjekurie, Interi dështoi sërish, duke shfaqur probleme të shumta dhe duke mos treguar personalitet.

Skuadra zikaltër luftoi deri në frymën e fundit sezonin e shkuar për t’u kthyer në Champions dhe këtë verë bëri merkato të mirë në pamje të parë, por gjithçka u shkri si sheqeri në ujë, sapo nisi futbolli i vërtetë, që është ai i Europës, shumë herë më i fortë dhe më cilësor se Seria A.

Kundër PSV-së Interi kishte gjithçka në favor: luante në shtëpi, 60 mijë tifozë me vete, motivim i madh krahasuar me një rival të eliminuar, por pikërisht holandezët ishin ata që impresionuan për lojën e mirë dhe motivimin e shfaqur.

Edhe pas barazimit me Ikardin, që u duk se dha shkundjen e madhe, Interi e uli ritmin dhe vetëm në fund, kur erdhi lajmi i barazimit të Totenhemit në Barcelonë, zikaltrit u kujtuan të sulmonin, një qëndrim tepër i gabuar, që u kushtoi shtrenjtë italianëve, në imazh, moral e financa.

E DHËNA E FRIKSHME – Në fillim ndodhi në Wembley, me Totenhemin, më pas me PSV-në. Interi pati dy raste ideale për të siguruar kualifikimin dhe në të dy rastet dështoi.

Gjashtë ndeshje në grup, të gjitha me një tipar të përbashkët mjaft domethënëse: skuadra e drejtuar nga Spaleti pësoi gjithnjë gol e para, duke realizuar përmbysjen ndaj Totenhemit në Itali e PSV-së në Holandë.

Në 7 ndeshjet e fundit në të gjitha kompeticionet Interi ka fituar vetëm një herë, kundër PSV-së pritej fitorja që do i vinte kapak minikrizës, por tani është thjesht krizë, jo më ‘mini’. Nëse gjithë stadiumi të fishkëllen dhe tifozët dorëzohen që para pushimit, diçka mjaft negative po ndodh.

You might also like

Leave A Reply

Your email address will not be published.

This site uses Akismet to reduce spam. Learn how your comment data is processed.