Halili flet pas fitores: Nuk i prisja 5 gola! I thashë lojtarëve që mos na shtoni vuajtje, tifozët sakrifikojnë nga xhepi

Nëse do të përshkruanim Tiranën e Egbos deri tani, pas 12 ndeshjesh me 11 fitore dhe 1 barazim, atëherë tre do të ishin fjalët: “Pëso, përmbys, fito”. Në jo pak raste bardheblutë e kanë pësuar të parët, por në fund ia kanë dalë të marrin tre pikët.

Kështu ka rezultuar edhe në derbin e sotëm, atje ku është fituar në shifrat 5-1 ndaj Partizanit. Ndërkohë më poshtë mund të gjeni edhe intervistat e protagonistëve për “Supersport”:

Egbo (Tirana): “E kemi filluar ndeshjen shumë keq, por loja ndryshoi shumë pas kartonit të kuq. U tregova i qetë edhe pas golit të pestë, sepse jam besimtar në Zot dhe nuk besoj te asnjëri tjetër, duhet të tregohesha kështu. Pavarësisht se fituam 5-1 nuk jam i kënaqur sot, pasi nuk kemi luajtur mirë. Do ta diskutojë me ekipin pasi Partizani kishte një lojtar më pak, por ka luajtur si i barabartë. Për mua kjo ka qenë një nga ndeshjet tona më të dobëta deri tani. Nuk mendoj se e nxorrëm Partizanin jashtë titullit, është rrugë e gjatë. Nuk mund të them që kemi fituar kampionatin tani. Jo jo, tani të përqendrohemi te ndeshja e radhës dhe t’i marrim një nga një. E përgëzoj Partizanin për shpirtin e garës që kanë treguar. Kjo është Superiorja më e bukur që kam parë që kur kam ardhur në Shqipëri pasi të hapin të gjitha ekipet probleme. Rama tha se na kanë ndihmuar arbitrat? Nuk e di, ju i shihni vetë. Të gjitha golat tanë kanë qenë të saktë, por nuk kanë ndihmuar arbitrat. Edhe nëse bëjnë gabime, i bëjnë sepse ata nuk janë Zoti dhe janë njerëzore, por këtu kanë qenë të gjitha gola të saktë”.

Sormani (Partizani): “Ndeshja u mbyll pas 18 minutash, aty u vendos gjithçka. Arritëm që përveç golit, të krijonim edhe disa raste. I referohem sekondës së 15 kur duhej të kishim një 11 metërsh, por nuk na u dha. Nuk është se e kompeson ai goli jonë. Kjo ishte një ndeshje false pasi Bitri nuk duhej të ndëshkohej me karton të kuq. Rregullorja e thotë qartë se jepet penallti, atëherë nuk ka karton të kuq. I jap përgëzime Tiranës, por ndeshje pati vetëm për 18 minuta, pasi nuk kishte menaxhim të duhur. Shkarkimi? Nuk kam frikë nga asgjë, presidenti bën vlerësimet e veta, por unë punoj nga dita në natë dhe me kokën lartë. Kur kërkon rezultat me një lojtar më pak, duhet edhe të gabosh, pasi nuk mund të qendronim aty për të parë sesi Tirana do të qarkullonte topin”.

Batha (Tirana): “Nuk e mendon njeri që të fitohet 5-1 në një ndeshje të tillë. Sigurisht që rezultati nuk tregon lojën, por gjithmonë këto shifra 5-1 nuk kalohen kaq kollaj. E kam thënë që në fillim se nuk ishte fundi i botës që erdha te Tirana, se nuk isha as i pari dhe as i fundit. Gjesti me Melon e di se nuk është i hijshëm, është i shëmtuar, por ndodhin në gjithë derbit e botës dhe nuk jepet kartoni i kuq. Nuk është se e vrava. Mora me një goditje nga mbrapa nga Melo dhe ishte punë 2 sekondash që kam reaguar në mesfushë. Sot e kemi në plan të festojmë”.

Halili (Tirana): “Shiko se ishte një ndeshje shumë e rëndësishme, pasi luanim ndaj një rivali për titulli kampion. Shumë i gëzuar jam, por për të luftuar për titullin kampion është shumë larg, ka shumë ndeshje. Falenderoj gjithë lojtarët që gëzuan gjithë këtë tifozeri që sakrifikojnë nga xhepi i tyre për të mbështetur skuadrën. Të them të drejtën kam folur për herë të parë para skuadrës që mos na lini të vuajmë deri në fund të ndeshjes. Por nuk e kisha menduar që do të shkonin pesë gola. Tifozët janë oksigjeni i skuadrës”

Leave a Reply

Your email address will not be published. Required fields are marked *