Më në fund, Gjelbrim Taipi ka hedhur një hap të rëndësishëm përpara në karrierën e vet, sepse pas 4 sezonesh në divizionin e dytë zviceran, tashmë ka firmosur për Sant Gallenin në Superligë.
24-vjeçari shkëlqeu te Shkëndija e Tetovës në vitet 2011-2013, duke u bërë edhe pjesë e ekipeve të moshave të Shqipërisë, ndërsa në verën e vitit 2013 u transferua te Vili në Zvicër. Titullar fiks dhe i dalluar për 3 sezone rresht, Taipi kërkoi largimin verën e shkuar, kur klubi uli ndjeshëm nivelin e pretendimeve dhe largoi shumë titullarë. Mohimi i kërkesës për largim futi Taipin në konflikt me klubin, derisa në janar kontrata u prish.
Prej janarit Taipi luajti te Shafhauzeni, ku në 16 ndeshje shënoi 3 gola e dha 5 asiste.
Tani Taipi shkon te Sant Galleni, ku shpreson të tregojë sa vlen, pasi është një lojtar me potencial të madh dhe në krahun e majtë të mesfushës mund të bëjë gjëra mahnitëse.
Duhet kujtuar se tek Sant Gallen luan edhe sulmuesi Albian Ajeti, ndërsa prej sezonit të ri do të jetë edhe vëllai i tij Adonisi, duke e kthyer Sant Gallenin në një koloni të vogël shqiptare.
Zwei Neuzugänge: Gjelbrim #Taipi und Stjepan #Kukuruzovic wechseln zum #FCSG. Herzlich willkommen! https://t.co/9YSvGt6YV5. pic.twitter.com/hfC4LGJTfp
— FC St.Gallen 1879 (@FCSG_1879) June 7, 2017