Simo Rrumbullaku u largua nga Kukësi për të vazhduar një aventurë të re jashtë Shqipërisë. Mbrojtësi i majtë ka qenë një nga lojtarët më cilësorë të futbollit shqiptar në dy sezonet e fundit dhe largimi i tij do të lërë shumë hapësira në ekipin e Kukësit. Sot, me anë të Instagramit të tij zyrtar, mëngjarashi publikoi një postim, ku gjeti rastin t’i falënderonte të gjithë personat me të cilët ka bashkëpunuar:
“Pas dy edicionesh e gjysmë mjaft të suksesshme dhe plot emocione, aventura me Kukësin përfundon këtu. Klubi më bëri një ofertë shumë të mirë dhe me shumë vlerë për mua, por dëshira ime është që të luaj diku jashtë vendit dhe kjo gjë u mirëkuptua nga drejtuesit e klubit.
Dua t’i falënderoj, duke nisur nga presidenti Safet Gjici, drejtorin Nderim Nexhipi, të gjithë trajnerët dhe stafet që kemi bashkëpunuar, të gjithë lojtarët dhe padiskutim tifozët e mrekullueshëm, të cilët na kanë mbështetur në çdo ndeshje.
Së bashku arritëm të fitonim çdo trofe të mundshëm dhe për këtë jam mjaft krenar. Ka qenë një periudhë fantastike, pasi kam pasur mundësinë të bashkëpunoj me një nga klubet më të mirë në Shqipëri.