Ëndrra Champions dhe shkolla e futbollit, Berisha: Strakosha mes më të mirëve, mirënjohës ndaj Tares

Etrit Berisha nuk e nisi sezonin në mënyrën më të mirë, duke humbur vendin e titullarit tek Atalanta. Gardiani shqiptar nuk u dorëzua, uli kokën, punoi fort dhe u rikthye përsëri të mbrojë portën e ekipit bergamask.

29-vjeçari ka probleme në stomak dhe do të mungojë në ndeshjen kundër Kaljarit, ndërsa do të kthehet kundër Frozinones. Në një prononcim për mediat italiane, Berisha flet për objektivin e Atalantës, fillimit e tij në Serie A dhe eliminimin e dhimbshëm kundër Dortmundit në Europa Ligë.

Berisha zgjedh portierët më të mirë të momentit në Europë dhe Itali, ku nuk harron Strakoshën e Lacios, si dhe e mbyll me ëndrrat që ka dhe dëshirat e mëdha për të ardhmen.

ATALANTA – “Kemi humbur disa pikë, por Europa është e mundur. Mund të përballemi me çdo ekip, madje dhe me skuadrat e mëdha. Duhet të përmirësohemi në ndeshjet kundër ekipeve mesatare dhe të vogla. Gjithçka do të varet nga pjekuria jonë. Kemi 28 pikë, por na mungojnë 4-5 pikë për shkak të disa golave të evitueshëm që kemi pësuar. Megjithatë, renditja është e mirë dhe mund t’i arrijmë objektivat tonë.”

ARDHJA NË ITALI – “Kisha disa oferta kur luaja me Kalmarin në Suedi, por Tare u tregua deçiziv dhe e falënderoj. Ishte e pamundur të refuzoja Lacion, por doja të isha protagonist pas tre sezoneve si zëvendës i Marketit. Bergamo ishte një sfidë e re dhe shpresoja në një shans për të treguar vlerat e mia.”

BERISHA – “Eksperienca të ndihmon, ashtu si dhe gabimet. Eliminimi kundër Dortmundit na dhembi të gjithëve. Kam vuajtur, por ai episod në golin e Shmelcerit e forcoi karakterin tim. Sot jam i lumtur dhe e ardhmja ime është këtu. Klubi është ambicioz, nuk po luftohet më për qëndrimin në kategori, kështu që çfarë mund të kërkoj më shumë?”

ROLI I PORTIERIT – “Futbolli ka ndryshuar dhe këmbët vlejnë shumë dhe te portieri. Gasperini na kërkon që ta nisim aksionin nga porta. Golini? Ai është një djalë fantastik dhe një portier shumë i mirë. Ka një rivalitet të pastër mes nesh, gjithmonë kam punuar për të patur një mundësi dhe për t’i dhënë siguri shokëve të skuadrës.”

Berisha dhe Strakosha me kombëtaren kuqezi

MË TË MIRËT – “Më të mirët për momentin janë Loris, Pikford, Handanoviç dhe Oblak. Në Itali, përveç Samirit (Handanoviç), zgjedh Donarumën dhe e ardhmja i përket tij. Më pas është Kranjo (portieri i Kaljarit), i cili ka reflekse të shkëlqyera. Nuk harroj as mikun tim Tomas Strakoshën.”

ËNDRRA – “Dua të luaj në Champions dhe të fitoj ndonjë trofe. Do të ishte maksimumi t’i arrija këto objektiva me Atalantën. Më pas dua të merrem me zbulimin e talenteve dhe shpresoj shumë që të hap një shkollë futbolli në Kosovë.”

Leave a Reply

Your email address will not be published. Required fields are marked *