Shumë klube po përballen me një krizë të madhe ekonomike, madje disa edhe kanë falimentuar. Në një gjendje të tillë është edhe ekipi Royal Excel Mouscron, pjesë e së cilit është edhe ish-kapiteni i Kombëtares shqiptare, Rudi Vata. Ky i fundit mban postin e këshilltarit në klubin belg, ndërsa për një ndeshje u ul edhe në stolin e trajnerit, për të zëvendësuar atë aktualin. Por Mouscron duket se e ka zgjidhjen për të shpëtuar falimentin, megjithëse në dukje është e cuditshme.
Një shkrirje me skuadrën KV Kortrijk është zgjidhja e problemeve të tyre. E nëse kjo do të realizohej atëherë do të ishte hera e dytë për ekipin e Vatës, teksa më parë ka zgjedhur po këtë metodë duke u bashkuar në vitin 2010 me Royal Racing Club de Péruëelz. Vetë trajneri i Kortrijk, që është pjesë e elitës në Belgjikë, shprehet se një bashkim i tillë do t’u jepte një ndihmë në aspektin e akadmisë së tyre, që ka një kosto të madhe për klubin dhe qytetin. Por presidenti do të pranonte vetëm nëse nuk do të cënohej identiteti i tyre. “Kurrë nuk ka qenë qëllimi ynë të heqim dotë nga stema, ngjyrat apo stadium ynë. Ne jemi një klub i pasur dhe mund të vazhdojmë edhe vetëm si KV Kortrijk”, ka thënë kreu i klubit belg.
Megjithatë mbetet në dorën e Mouscron nëse do të pranojë kushtet e sipërpërmendura. Në rast se do të arrihet marrëveshja, atëherë do të ishin plot tre ekipe të shkrirë në një, duke marrë parasysh edhe bashkimin e vitit 2010 të bërë nga klubi ku punon edhe Rudi Vata. Ndërkohë një praktikë e tillë është ndjekur edhe nga Lokereni. Këta të fundit shpallën falimentin, por u shkrinë në një ekip të vetëm me skuadrën e ligës së 4-t, Temse. Të dy klubet do të mbajnë një emër të përbashkët dhe fanellat me ngjyrat e Lokeren, ndërsa do të garojnë në kategorinë e 4-t të Belgjikës./Halit Delibashi-Sport Ekspres/