Paulo Dibala festoi 25-vjetorin e lindjes ditën e djeshme dhe në drejtim të argjentinasit kanë ardhur urime pafund. Më i bukuri dhe i veçanti ka ardhur nga një legjendë e bardhezinjve si Aleks Del Piero.
Pavarësisht se me bluzën e Juventusit kanë luajtur shumë kampionë të mëdhenj, në zemrat e tifozëve të bardhezinjve nuk është askush sipër Del Pieros. Një kapiten i madh, lojtar fantastik dhe besnik pa kushte i ngjyrave bardhezi.
Aleks ka postuar një foto, duke bërë shenjën e maskës, që përdoret nga Dibala gjatë festimeve të golave të shënuar. “Gëzuar ditëlindjen, Paulo”, shkruan Del Piero, ndërkohë që nuk ka munguar reagimi i “Joya”-s. “Të lindur në të njëjtën shenjë. Faleminderit kampion”, i përgjigjet Dibala, duke kujtuar që dy numrat dhjetë të Juves i përkasin shenjës së akrepit.
