Çelsi fiton, por Konte i bën dalje David Luizit

Nuk ka paqe te Çelsi, sepse edhe fitorja e djeshme ndaj Mançester Junajtid nuk ka rikthyer tërësisht qetësinë dhe buzëqeshjen. Álvaro Morata i dha fitoren Çelsit, që ka reaguar mirëpas humbjes në Romë, por një lojtar kyç si David Luiz e ndoqi ndeshjen nga tribuna.

Sipas trajnerit Antonio Konte, mbrojtësi brazilian u la jashtë për shkak të formës së tij shumë të dobët, ndërkohë që zëvendësuesi i tij, danezi i ri Andreas Kristensen, u paraqit shkëlqyeshëm.

Konte mori në stol edhe mesfushorin 17-vjeçar Etan Ampadu, duke lënë jashtë David Luizin, i cili tashmë rrezikon largimin.

“Nuk e di a ka të ardhme David Luiz te Çelsi. Ai duhet të punojë shumë, përndryshe qëndron në stol ose tribunë. Trajneri vendos për të mirën e skuadrës dhe sot vendimi im ishte të luaja me Kristensen dhe të merrja në stol Ampadun, një tjetër lojtar i ri, me të tashme dhe të ardhme premtuese. Ndoshta në të ardhmen do të vendos ndryshe, ose do të vazhdoj kështu, është normale, nuk vendos vetëm për të mirën e një lojtari, por të gjithë skuadrës dhe klubit. Çdo lojtar do të ketë të njëjtin fat si Luiz, nëse nuk është në formë, është mëse normale”, tha Konte pas ndeshjes.

Leave a Reply

Your email address will not be published. Required fields are marked *