Bushi analizon miqësoret: Shpresat kanë lojtarë për kombëtaren e Panuçit

0

Alban Bushi është i kënaqur nga të rinjtë që ka provuar në javët e fundit në ndeshjet miqësore kundër Bosnjë-Hercegovinës dhe Bjellorusisë. Trajneri i Shpresave foli sot në një konferencë për shtyp, duke analizuar në detaje punën e bërë për evidentimin e talenteve, disa prej të cilëve premtojnë shumë.

“Mendoj se nga ky grumbullim kemi fituar 5-6 lojtarë të ditëlindjes 98-99, të cilët mund t’i përdorim për edicionin tjetër dhe jam tërësisht i kënaqur. Selahi, Spahiu, Shefiti, Kolaj, Shabani, por edhe të tjerë që debutuan këtë herë, mund të them me bindje se e kaluan testin dhe do të jenë e ardhmja e Shpresave. Ata luajnë në klube të mira dhe kanë shumë minuta në këmbë, ndaj besoj se kjo është mjaft pozitive”, tha Bushi.

Gjithsesi, kjo nuk do të thotë që tashmë kemi një ekip të aftë të sfidojë ballë hapur Spanjën në vjeshtë: “Të jem i sinqertë, nuk është se punova me mendjen te Spanja, por për të përmirësuar filozofinë tonë të lojës dhe për të përfshirë në ekip lojtarët e grumbulluar rishtazi. Me Spanjën do të tentojmë të bëjmë diçka ndryshe, pasi do të grumbullojmë lojtarët më ekspertë dhe do të luajmë të tërhequr, sepse e dimë se në të kundërt mund ta pësojmë keq”.

Sulmi mbetet shqetësim madhor për trajnerin e Shpresave: “Me sulmuesit kemi pasur probleme me thënë të drejtën, pasi nuk është se kanë shënuar gjatë kësaj periudhe. Mund të them se edhe ata kanë pasur probleme me dëmtimet, siç është rasti i Durmishajt, që ka luajtur vetëm dy ndeshje. Në ndeshjet e fundit morëm Manajn që shënoi, të cilin mund ta kishim marrë edhe më herët. Gjithsesi, jam i lumtur që shënoi edhe portieri, por veçanërisht që morëm barazimin, që do t’i shërbejë moralit”.

Për Bushin Superiorja ka mundësi për të prodhuar më shumë lojtarë, ndërsa veçon nga ekipi i tij një lojtar që duket gati për ekipin A: “Është e rëndësishme që Superiorja të përmirësohet dhe të rritet gjithmonë e më shumë, për të qenë një furnizues jo vetëm i Shpresave, por edhe Kombëtares së madhe. Vetëm vitin e fundit kanë spikatur disa lojtarë të rinj në Superiore, siç është rasti i Gurit, Bregut, apo Abazajt, ndërsa edhe skuadrat po punojnë shumë më seriozisht, duke zhvilluar faza përgatitore jashtë vendit etj. Superiorja vijon të mbetet në fokusin tim dhe ka shumë talente, por më duhet të pranoj që ende lojtarët e këtij kampionati, kanë mangësi nga ana taktike”.

“Ka shumë lojtarë cilësorë që mund t’i bashkohen skuadrës së Panuccit, duke filluar që nga muaji shtator, siç iu bashkuan disa të tillë tani. Mund të përmend Seferin, që luan me Jang Bojs dhe është shumë potent. Këtë lojtar e shoh gati për të luajtur me Kombëtaren e madhe, pasi ka entuziazmin, potencën dhe pjekurinë e duhur për ta bërë”.

You might also like

Leave A Reply

Your email address will not be published.

This site uses Akismet to reduce spam. Learn how your comment data is processed.