Bubeqi: Boll me përbaltje, Erzeni nuk toleroi!

0

Pas humbjes me Besëlidhjen në Shijak, Erzeni rinis sot stërvitjen. Ekipi i drejtuar nga Dorian Bubeqi nuk ia doli të fitonte në sfidën e së premtes, ndikuar edhe nga gjykimi i dobët, ku goli i miqve ishte në pozicion të dukshëm jashtë loje. Erzeni këtë javë do të jetë pushim, ndërsa kjo periudhë do t’i shërbejë shumë për qetësi dhe rifreskim të energjive.

BUBEQI – I kontaktuar nga “Sport Ekspres”, trajneri i Erzenit, Dorian Bubeqi, i jep zemër skuadrës dhe hedh poshtë akuzat e ngritura. “Të premten Erzeni luajti futboll, luajtëm fort dhe nuk merituam atë humbje, aq më tepër për mënyrën se si erdhi. Ne, luftuam fort kundër një ekipi i cili përveçse shumë i motivuar ndaj nesh, atë ditë ishte edhe në formë. Ndërsa, neve na u desh të luanim edhe ndaj arbitrave por edhe ndaj presionit të takimit, i cili ishte i gjithi mbi ne. Unë e kam shprehur edhe më parë, se nuk jam marrë me gjykimin edhe pse jemi dënuar shumë prej tij. Por, në këtë ndeshje, ku gjithçka ishte e komplikuar nuk mund të na bëhej një padrejtësi e tillë. Të gjithë atyre që na akuzojnë, i kërkoj të ndjekin ndeshjen, ta vlerësojnë dhe jo të flasin e të na përbaltin. Kemi folur edhe me tifozët, ato gjithashtu ishin koshient se u luajt pastër. Na mbështetën fuqishëm dhe në fund na duartrokitën. Jemi i vetmi ekip, që edhe pse kemi qenë larg vendit të parë, kemi pasur mbështetje pa kushte, nga tifozeria. Nuk dëshiroj të dëgjoj më për tolerime, pasi po prishet bukuria e kampionatit, me fjalë boshe. Ato që hedhin “baltë” mbi Erzenin, e bëjnë për të mbuluar “pisllëqet” e tyre. Tashmë me ekipin do shohim përpara. Kemi ndeshjen e radhës, do e përgatitim për fitore”, ka theksuar Bubeqi, trajneri apasionant i shijakasve, i cili ndaj Besëlidhjes, bëri një reagim mjaft të mirë, duke mos lejuar askënd që të prekte gjyqtarët.

Glen Domi

SHPËRNDAJE

PËRGJIGJU

Please enter your comment!
Please enter your name here


CAPTCHA Image
Reload Image