“Absurde që nuk kemi një përgjigje”, Nurishmi flet për kampionatin: Shtyrjen dëgjova në media, i donim ndeshjet në mbrëmje

0

Qeveria vazhdon të zvarrisë futbolli në Shqipëri, teksa vijon të mos japë dritën jeshile për të miratuar kështu datën 3 qershor si rifillim të Superiores. Diçka e tillë duket absurde për Shefin e Sektorit të Garave, Lysien Nurishmin, i cili në një intervistë për emisionin “Fan Zone”, ka bërë dije se FSHF ka dërguar shkresë në Ministrinë e Shëndetësisë dhe se përgjigja është shumë e vonuar.

Sipas tij nuk ka sens logjik të hapet gjithçka, duke nisur nga kopshtet, çerdhet, baret e restorantet apo edhe kufijtë dhe të mbahet ende peng futbolli. Nurishmi ka shpjeguar edhe mënyrën se si do të veprojnë gazetarët gjatë takimeve të Superiores.

Kreu i Sektorit të Garave zbulon se dëshira e FSHF është që të gjitha takimet të luhen në orën 20:00, por mungesa e ndriçimit e pengon diçka të tillë. Sipas tij ky orar është më komod sa i përket temperaturave të larta në verë, si dhe nga ana tjetër siguron shikueshmëri më të lartë pasi shumica do të jenë nëpër shtëpitë e tyre.

Seminari për protokollin: “Nuk do të ketë media në fushën e lojës, përveç një reporteri dhe 2 fotografëve zyrtarë të klubeve. Sugjerohet që komenti të bëhet në zona të hapura e po ashtu edhe intervistat. Përveçse me transmetuesin ekskluziv, nuk do të ketë intervista me mediat e tjera. Duhet të ruajmë distancën, për të mos qëndruar pranë njëri-tjetrit. Është rënë dakord që kampionati të rifillojë pa bërjen e tamponave. Është miratuar protokolli, që nuk e përfshin testin. Do të bëhet vetëm matja e temperaturës. Nuk do të ketë më konferenca shtypi dhe gazetarë që presin në zonën miks“.

Pa përgjigje nga Qeveria: “I është dërguar një shkresë ministrisë, jemi në pritje për një aprovim. Është përcaktuar dhe kalendari me datat oraret dhe ndeshjeve. Më datë 3 duhet të rinisë sezoni. Ky është plani, presim dritën jeshile. Ky kalendar përkon dhe me afatin e UEFA-s për kupat e Europës. Mungesa e përgjigjes? Ne jemi të vetëdijshëm që jeta po rifillon normalisht. Në datën 1 qershor do të hapen çerdhet edhe kopshtet. Siguria është më e madhe në fushën e lojës se në bare dhe restorante. Është absurde që nuk kemi marrë akoma një përgjigje nga qeveria. Jemi vonë, duhet ta kishim përgjigjen. Duhet të diskutonim për çështje më të rëndësishme“.

Shtyrja më 7 qershor? “E kam dëgjuar në media, por nuk kemi folur dhe pasur asnjë qëndrim për datën 7. Ne jemi për datën 3. Është bërë një plan dhe është përcaktuar kalendari i detajuar. Duke filluar nga Superiorja te Kupa e Shqipërisë. Do të ketë probleme nëse nuk fillon në datën 7. Data 2 gusht është afati i fundit për të dërguar emrat e ekipeve në UEFA. Në rast se do të kemi hapje të kufijve, është absurde që futbolli të mos fillojë. Në rast se një lojtar rezulton pozitiv, ai do të largohet dhe lojtarët që kanë qenë në kontakt do testohen, për të parë nëse janë të kontaminuar.

Ndeshja nuk mund të organizohet sot për nesër. Do të kontaktojmë personalisht me grupin e punës, për t’iu kërkuar një konfirmim për datën 3. Është në të mirën e të gjithëve. Janë disa hallka që duhet të lidhen. Shpresoj që brenda kësaj jave të kemi një përgjigje përfundimtare”.

Ndeshjet në orën 20:00: “Në orën 20 ka shikueshmëri të lartë, njerëzit janë në shtëpi. Është rënë dakord edhe me klubin e Partizanit. Po të kishte sistem ndriçimi, do të dëshironim t’i zhvillonim ndeshjet në atë orar, pasi dhe temperaturat janë më të ulëta dhe është më komode. Shpresojmë që javën e ardhshme të flasim për futbollin e luajtur”, ka deklaruar Lysien Nurishmi./Halit Delibashi-Sport Ekspres/

You might also like

Leave A Reply

Your email address will not be published.